അക്ഷരം ..

എന്തോ കുറിക്കുവാന്‍
എടുത്ത കടലാസില്‍
"അമ്മ"എന്ന് ഞാന്‍
അറിയാതെ എഴുതി.

പിന്നെ, വായിച്ചപ്പോള്‍
എന്‍ മനമൊന്നു പിടഞ്ഞു.
കണ്ണുകള്‍ ഈറനണിഞ്ഞു..
ആ അക്ഷരങ്ങളില്‍
അമ്മതന്‍ ആത്മാവ്
ഉള്ളതായി തോന്നി.

വീണ്ടും,
ആ കടലാസ്സു നിറയെ
അമ്മ എന്ന് ഞാന്‍
എഴുതിക്കൊണ്ടിരുന്നു..!!

സത്യം ..

ഈ വിരല്‍ തുമ്പിനപ്പുറം
നീ അറിയാതെ പോയ
ഒരു സത്യമുണ്ട്.

ഞാനെന്ന സത്യം.!
ഞാന്‍ ഞാനല്ല എന്ന സത്യം.!!
എനിക്കൊരിക്കലും
ഞാനാകാന്‍ കഴിയില്ല
എന്ന സത്യം.!!!

നിന്നില്‍ നിന്നും
ഞാനെന്നെ
മറച്ചു വെച്ചു.
അല്ല,
നിന്റെ ചിരിയുടെ
മറവില്‍ ഞാനത്
ഒളിപ്പിച്ചു വെച്ചു.
ആ ചിരി
മായാതിരിക്കാന്‍.

ഇനിയെനിക്ക്
ഞാനാകണം.
നിന്‍ കിനാവുകളില്‍
എന്റെ മുഖമുണ്ടാകണം.!
അതിനു ഞാന്‍
നിന്നിലേക്ക്‌ അലിയണം.
നിന്‍ പ്രതിരൂപമാവണം.!!

അതുവരെ
ഞാന്‍ കാത്തിരിക്കാം..
അതല്ലേ ശരി?

നിനക്കായ്

അത്മസ്നേഹത്തില്‍
നിറം കലര്‍ത്തിയപ്പോള്‍
നിന്‍ കൈവെള്ളയില്‍
പുരണ്ട പാപത്തിന്‍ വിഷക്കറ
എന്റെ കണ്ണുനീരാല്‍
കഴുകിക്കളയാനാകുമെങ്കില്‍ ;
ഞാന്‍ നിനക്ക് വേണ്ടി കരയാം.
കണ്ണുനീര്‍ വറ്റും വരെ...!!

കണക്കു പുസ്തകം..

എന്‍റെ
കണക്കുകൂട്ടലുകള്‍
വീണ്ടും പിഴച്ചു
തുടങ്ങിയിരിക്കുന്നു.

ഏറെനാള്‍ മുന്‍പ്
മടക്കി വെച്ച
ആ കണക്കുപുസ്തകം
ഇന്നലേ വീണ്ടും
നിവര്‍ത്തി നോക്കി.

വല്ലാത്തൊരു മണം.
ചിലതാളുകള്‍
ജീര്‍ണ്ണിച്ചിരിക്കുന്നു.

എങ്കിലും,
ആദ്യാന്ത്യം ഞാനൊന്ന്
പരതി പരിശോധിച്ചു.

കണക്കുകളില്‍
തെറ്റുകള്‍ ഉള്ളതായി
തോന്നിയില്ല.

പിന്നെയോ,
കുറച്ചു കൂടി എഴുതി
ചേര്‍ക്കാന്‍ ഉണ്ടായിരുന്നു.

ഇപ്പോള്‍ ,
ഈ കണക്കു പുസ്തകം
പൂര്‍ണ്ണം.
താളുകള്‍ നിറഞ്ഞു.

ഇനി പുതിയൊരു
കണക്കു പുസ്തകം
വാങ്ങണം.
കണക്കു കൂട്ടലുകള്‍
വീണ്ടും പിഴച്ചതായ്
തോന്നുമ്പോള്‍
അങ്ങോട്ട്‌ പകര്‍ത്താം..!!

വിഷാദം..

നഷ്ടപ്രണയത്തെക്കുറിച്ച്
ചിന്തിക്കുന്നതും,
കൂടെ സഞ്ചരിക്കുന്ന
മരണത്തെക്കുറിച്ച്
കവിതകളെഴുതുന്നതും,
യാത്രകളുടെ
ചിത്രങ്ങള്‍ വരക്കുന്നതും,
മനസ്സില്‍ തറച്ച 
ചിന്തകളുമായി
ദിവസങ്ങളോളം
മൗനമായിരിക്കുന്നതും
വിഷാദ രോഗത്തിന്‍
ലക്ഷണമെത്രേ..!

ഇപ്പോള്‍,എന്നെ നയിക്കുന്നത്
ഇത്തരം ചിന്തകളാണ്.!!

എനിക്കും
ഇതേ രോഗമായിരിക്കും അല്ലെ..?

ബാക്കി

കാലമൊരു നാള്‍
എനിക്കുമൊരു
കുഴിമാടമൊരുക്കും..

അവിടെ നിങ്ങളെന്നെ
കുഴിച്ചു മൂടും.
ഒപ്പം,എന്റെ സ്വപ്നങ്ങളും.!

ഈര്‍പ്പമുള്ള
ആ മണ്ണിനു മുകളില്‍
രണ്ടു കല്ലുകള്‍ വെയ്ക്കും

അതെന്‍റെ കുഴിമാടത്തിനു
അടയാളമാണ്.
ഇളകി മാറും വരെ.

എല്ലാറ്റിനും സാക്ഷിയായി
ചിലപ്പോള്‍ നീയുണ്ടായേക്കാം.!

എങ്കിലും,
ഒന്നുമാത്രം ബാക്കിയാവും.
നിനക്ക് ഓര്‍ക്കാന്‍
ഞാന്‍ തന്ന ഓര്‍മ്മകള്‍ ..!!

അതുമാത്രം നീ 
കുഴിച്ചു മൂടരുത്
കാരണം,അതു ഞാന്‍
നിനക്കായ് മാത്രം
ബാക്കി വെച്ചതാണ് ..!!!

തിരിച്ചറിവ്...

കണ്‍മുന്നില്‍
കണ്ടതെല്ലാം
സത്യമെന്ന് കരുതി
കണ്ണുകളെ
വിശ്വസിച്ചു..

ഒടുവില്‍,
അതുവെറും
കാഴ്ചകളാണെന്ന്
തിരിച്ചറിഞ്ഞു.

അന്നു മുതല്‍
എനിക്ക് കണ്ണുകളെയും
വിശ്വാസമില്ലാതായി ..!!