കേട്ടത്..

ആരോ
പറയുന്നത് കേട്ടു
എഴുത്ത്
മരിച്ചെന്ന്!

ആരാണ്
പറഞ്ഞത്
എഴുത്ത് മരിച്ചെന്ന്..!!

മരിച്ചത്
എഴുത്തല്ല;
വായിക്കാനുള്ള
നിന്‍റെ മനസ്സാണ്..!!

പാഠം ..

മദ്യം വിഷമാണെന്ന്
എന്നെ പഠിപ്പിച്ചത്
മൂന്നാം ക്ലാസ്സിലെ
ഗുരുനാഥനായിരുന്നു .

അന്നു മുതല്‍
ഞാനും മദ്യത്തെ വെറുത്തു.
സ്നേഹിതരെ
ഉപദേശിച്ചു.

ഇന്നലെ,

വീണ്ടും ഞാനീ

ഗുരുനാഥനെ
രാത്രിയുടെ മറവില്‍
കണ്ടു.
അപ്പോള്‍ അയാള്‍
മദ്യത്തിന്റെ ലഹരിയിലായിന്നു!

എന്തു പാഠമാണ് ഞാന്‍ പഠിച്ചത്.?

കണ്ണട വെച്ചത് ..

എന്‍റെ
കറുത്ത കണ്ണട
കളഞ്ഞുപോയി!

കാഴ്ച
ഇല്ലാത്തതു കൊണ്ടല്ല
ഞാന്‍
കണ്ണട വെച്ചത്!!

ചില കാഴ്ചകളെ
മൂടി വെയ്ക്കാനാണ്.!!!

ഗന്ധം

അന്നൊരു മഴയില്‍
അമ്മ തന്‍ മാറിന്‍ ചൂടില്‍
തല ചായ്ച്ചുമയങ്ങുമ്പോള്‍ ;
എന്നില്‍ മുലപ്പാലിന്‍ 
ഗന്ധമായിരുന്നു.

ഇന്നിവിടെ,
അതുപോലൊരു മഴ
ഏകനായി നനഞ്ഞപ്പോഴും
ഞാനമ്മ തന്‍  ഗന്ധം
തേടുകയായിരുന്നു.

കണി ..

ഇന്നു ഞാനൊരു
കണി കണ്ടു.
ചിതറി കിടക്കുന്ന
മനുഷ്യ ശരീരത്തെ
ഏതോവാഹനം
ഇടിച്ചിട്ടു പോയതാവാം.!

കൊള്ളാം നല്ല കണി!
ഇന്നിത് ശുഭ സൂചകമായിരിക്കാം!!

അറിയാതെ പോയത്..

പ്രണയമെന്ന്
ഞാന്‍ പറഞ്ഞു.
അല്ല ഭ്രാന്തെന്ന് 
നീയും.!

എന്‍റെ പ്രണയം
ഭ്രാന്താണെന്ന്
ഒടുവില്‍ ,നീ 
തിരിച്ചറിഞ്ഞല്ലോ..!!

നീ മറച്ചത്..

കറുത്ത
തുണി കൊണ്ട്
പെണ്ണെ
നീ മൂടിവെച്ചത്‌
നിന്‍
മുഖത്തെയോ..
നാട്യമാം
കപടതയോ.?

നിഘണ്ടു..

മറന്നോ എന്ന വാക്കും,
മരിച്ചോ എന്ന വാക്കും
എന്‍റെ നിഘണ്ടുവിലെ
ഒരേ അര്‍ത്ഥമുള്ള
രണ്ടു വാക്കുകളാണ്.!!

എന്റെ ലോകം...

ഞാനെന്‍റെ ലോകത്താണ്.
സ്വയം തീര്‍ത്ത ലോകത്തില്‍
കാമത്തിന്റെ,ഉന്മാദത്തിന്റെ
അഭിനിവേശത്തിന്റെ ലോകത്തില്‍.

സുഖം മാത്രം തേടി അലയുമെന്നെ-
നീയെന്തു പേര് വിളിക്കും?

ഉന്മാദം മൂര്‍ധന്യത്തിലായൊരു രാവില്‍
എന്‍ ഹൃദയത്തിലൊരു കഠാര തറച്ചു.
ധമനികളെ കീറിമുറിചാഴ്ന്നിറങ്ങിയ-
കഠാര ഇനി തിരിചെടുക്കതിരിക്കാം.

ഇറ്റിറ്റു വീഴും രക്തത്തുള്ളികള്‍
നിലം അശുദ്ധമാക്കാതിരിക്കട്ടെ!

എന്‍ ഉന്മാദമെത്ര ആനന്ദം!
കാമനകള്‍ എത്ര മനോഹരം!

ചിന്തകള്‍ക്കുള്ളില്‍ ചിതലരിചീടും
രാവിന്‍റെ നഗ്നമാം ഗര്‍ഭപാത്രം.
അവിടെയെന്‍ നഷ്ടങ്ങള്‍
ഭ്രൂണമായി വളര്‍ന്നിടാം..
അതവിടെ തന്നെ നശിക്കട്ടെ!

രാവുകള്‍ വീണ്ടും പുലര്‍ന്നിടും
രാവും നാളെയെന്നെ കൈവിടും.
പിന്നെ,ഞാനെന്നെയും..!!

പുതുവത്സരാശംസകള്‍ .....

നന്മകളും,ഐശ്വര്യവും നിറഞ്ഞ
ഒരു പുതുവത്സരം ആശംസിക്കുന്നു..