ജീവിത യാത്രയില്‍,
പിന്നിട്ട വഴികളില്‍ 
പിന്തിരിഞ്ഞു നോക്കുവാന്‍
എനിക്ക് ഭയമാണ്!

പ്രതീക്ഷകളുടെ കിനാവിലേറി
ഞാന്‍ നടന്നതത്രെയും 
പരാജയത്തിന്‍റെ ദൂരവേഗമായിരുന്നോ?

ഓര്‍മ്മകളിലിടറി
മസ്തിഷ്കം മരിച്ചവന്റെ 
ശവസംസ്കാരം കഴിഞ്ഞു
മടങ്ങവെയാണ്;
എന്നിലേക്ക്,
പഴയോരോര്‍മ്മയായ്‌ 
നീ കേറി വന്നത്..!!

അകലം

പറഞ്ഞു തീരാതെ,
പിഴച്ചു പോയ 
വാക്കുകളാണ് 
നമുക്കിടയില്‍,
നീയും,ഞാനുമെന്ന 
അകലങ്ങള്‍ തീര്‍ത്തത്.!!

മതില്‍---

അതിരു കെട്ടി 
നീ മറച്ചത്-
മണ്ണിനെയല്ല;
മനസ്സിനെയാണ്.!!

മറന്നത്

ഇന്നലെകളെ
നീ മറന്നു.
ഞാന്‍
ഇന്നിനെയും.!

അതാണ്‌,
നമുക്കിടയില്‍
ഇന്നലെകളും,ഇന്നും
ഇല്ലാതെ പോയത്.!!

ഓര്‍ക്കേണ്ടതും,
മറക്കേണ്ടതും
അറിയാതെ പോയത്..!!

ചുമച്ചു തുപ്പിയപ്പോള്‍ 
ചുവന്ന നിറം..!
ചൂഴ്ന്നെടുത്തതെന്‍
ചതഞ്ഞ ഹൃദയവും ..!!

'ഗര്‍ഭം'

നിറ വയറും,

പേറ്റു നോവും
പെറ്റൊഴിഞ്ഞപ്പോള്‍
പിറന്ന കുഞ്ഞിന്
പുറകില്‍ ചായ്പ്പിലെ
വിറകുപുരയില്‍
ജീവനോടൊരു സ്മാരകം..!!
--------------------------------

ഇന്നത്തെ വാര്‍ത്ത
-------------------------
(അവിഹിത ഗര്‍ഭത്തില്‍ പിറന്ന കുഞ്ഞിനെ
യുവതി ജീവനോടെ കുഴിച്ചുമൂടി..)